وا شتي يا صاحبي سباب تخمامي
سباب همي و ما كدر يامي
ماكرهت الفرحة ورايا و قدامي
................
واش عاقلين ايام زمان
ايام العز بالبرهان
و التيقة فكل مكان
القلب على القلب حنان
ايام التيقة و الامان
و العز ما عندو تمان
.............
كان . سمعو يا حضار
عار الجار على الجار
التيقة و الحشمة و الوقار
صندوق مقفول عالاسرار
كان الجار قبل الدار
وجهو ديما مبشار
..............
ينفق من خيرو و جودو
او فالمرض عوين و يعودو
سبع فالخير قد بقدودو
يا حسراه زمان بورودو
حسن الكلام و زين ردودو
زمان الخير كسر قيودو
..............
كان الصاحب كان الصديق
يدير لك الطريق فالضيق
و يبعد عليك الشوك من الطريق
و زين الكﻻم زين رقيق
ياحسراه على الزمان لحقيق
و زمان الحنة و زمان لعقيق
...........
كان ياسيادي الخير و الخمير
كان التقوى كان التيسير
كلشي يعمل و الرزق لكثير
الغني حنين يرفق بالفقير
تنزل الرحمة و يكتر الخير
و الله ربنا الحنان الكبير
.............
وا شتي يا صاحبي سباب تخمامي
سباب همي و ما كدر يامي
كرهت نبقى ساير و العواج قدامي
............
ياك غير القنديل و الزيت و لفتيلة
و خرافة الونجة نسمعوها كل ليلة
تحكيها الجدات بصوات عليلة
كانت الفرحة و كانت القبيلة
واخا البرد و الريح و الدفا وقيلة
نشوفو الصفا فقلوب اصيلة
.........
وا شتي يا صاحبي سباب تخمامي
........مراد دروزي........
ليست هناك تعليقات:
إرسال تعليق